عيش حياتك ماتخليش توافه الامور تزعزع نفسيتك !

كانعتبر كاع الآلام واللحظات الصعبة لي كانمر منها أنها عابرة .. و غادوز كيف دازت بزآف ديال الاحزان و الايام الصعبة لي كنت كانعتقد أن لا نهاية لها .. و كانقول لراسي كلما حسيت بالضيق، نعم نفسيتي مدمرة دابا و ماهي غير ساعات أو أيام و غادوز ان شاء الله و ماغاتبقاش الامور على حالها مدى الحياة.. إذن ماغاندوزش وقتي و أنا كانشكي و نتاقد أي حاجة وقعات ... غانصبر و غانقاوم فهاذ المدة و ماغانخليش هاذ الحزن يخسر نهاري و أنا أصلا عارفو غايدوز غانبتسم و غانضحك صحة غانتجاهل باش كانحس غانتظاهر بأني بيخير ماغانخلي حتى واحد يشفق عليا دزت ماصعب من هاذشي و أنا قادر ندوز حتى هاذ المرة بإذن الله.

أي تجربة خايبة دزتي منها غاتعطك دروس لي ماكنتيش غاتعرفهم لولا هاذ التجارب لي كاتمنى أنهم مايكونوش .. مني تكون فشي مرحلة صعبة حاول تصبر و تكون أيجابي ما أمكن راه مهما طولات غادوز ان شاء الله .. ماتخليش مثل هاذ اللحظات يأثرو علك و يحطموك و يخليوك فاشل و حاقد ! يكون ايمانك بالله قوي و عرف أنه أي حاجة خايبة دزتي منها عندك الاجر ديالها خاصك غير تصبر غير تصبر.

و ماتمناش حياتك تكون بدون مشاكل حيت مايمكنش حنا ماشي فالجنة .. كون أكيد أخي أختي أنك ضروري ماغادوز من المحن ضروري ماغاتعيش الحزن الألم الكآبة ... ولكن ! الفرق لي غايكون هو واش نت غاتقدر تجاوز هاذشي و تكمل حياتك ولا غاتخليه ياخد السيطرة فبلاصتك و يديرك تحت رحمتو و يعدبك كل نهار كل تانية !! نت خصك تكون قوي آآه كون قوي ! تجاوزتي شحال من حاجة فالماضي ماتخليش شي حاجة تافة تجي تخسر لك حياتك ... مني كانتفكر شي حوايج خلاوني نتعصب خلاوني نمرض ف سنوات دازو كانبقا نضحك على راسي و نضحك على التفاهة ديالك داكشي لي وصلني لديك الحالة، حتى كيدوز الوقت عاد كاندركو أننا كنا عاطيين قيمة لشي حوايج لي ماكانوش يستحقو .. هاذشي علمني أنه حتى حاجة ماكاتستحق نمرض راسي معاها حيت مع الوقت غاتمشي و غاتنسا، علاش نصدع راسي معاها دابا !

عيش حياتك ماتخليش توافه الامور تزعزع نفسيتك ماتخلقش جو مضطرب على والو و ماديرش بحال هذاك لي حرق البيت ديالو بسبب حشارة ! خاليك كالم و عالج الامور بهدوء و عقلانية ماتسرعش و تاخد شي قرارات تندم عليهم غير حيت كنتي غاضب و نصيحتي الاخيرة ليك هي حاول تكون فرحان و سعيد فأغلب أوقاتك استمتع بحياتك را غايجي واحد النهار و غاتموت وهاذشي كآآآمل ماغاتبقا عندو معنى.