كلام الى كل شخص حساس

حساس كاتآثر بأبسط الاشياء .. بعد مرات ماكاتنعسش بالتفكير بسبب كلمة ستفزاتك تكون مقصودة ولا مامقصوداش .. بعد مرات كاتوصلبك حتى لبكاء .. كاتحط راسك على المخدة و كاتبقا تعاود في سيناريوهات كيفاش وقع وعلاش وقع و كاتعدب في روحك !! و كتمنى تكون ماكتسوقش لأي حاجة تقالت لك ولا فك ..

شخصيا كانشوف أن أكثر فئة واكلة لعصة نفسيا هي هاذ الفئة لي كتآثر دغيا و كتآثر من أتفه الأشياء !!

ماسولتيش راسك حتى لايمتا غاتبقا بحال هاكا حتى لايمتا غاتبقا تعاني و تستحمل و تخزن في قلبك .. و تمرض نفسيتك بسبب أشياء ماكاتستهلش ..

دير فبالك واحد الحاجة .. الأذى كان و كاين و غايكون وغايبقا .. واخا تكون طيب ولا شرير راك غاتآذى و كاين البعض لي واخا تعاملهم زوين غايآديوك 

شوف غير الرسول صلى الله عليه وسلم كان أطيب خلق الله ولكن تآدا مرارا و تكرارا 

اوكي حنا متافقين أنك ماحدك في هاذ الدنيا ماغاتسلمش من البشر .. ولكن واش الحل هو فينما تلقيتي شي أذى تبدا تبكا ؟؟!! ولكن ماشي لخاطري اش ندير ؟!! غاتقول لراسك هاذشي " اه فعلا كاين بعض الناس لي ماكيتسوقوش للمشاعر ديال لغير و لي جات في فمهم كايقولوها .. ولكن ماغانبقاش نخلي هدرتهم تآثر فيآآا !! ماغانخلييييييش شي حد يتحكم في المشاعر ديالي و ماغانضيع حتى تانية في التفكير فآش قالووو و فأش داروووو .. حيت ببساطة الى ضيعت وقتي في التفكير فداكشي لي دارو معايا غانكون عطيتهم قيمة كثر من قيمتهم .. أنا عارف(ة) راسي اش كانسوا إذن داكشي لي كيتقال فيا زايد ناقص" 

خصك تعلم اللامبالاة خصك تعلم تنسا و تجاهل و تحايد ديك الحساسية الزايدة حيت غادمر غير حياتك و غاتمرض النفسية ديالك ! دائما مني تجي شي حاجة و تخسر لك المزاج ديالك جلس مع راسك و سول راسك واش هاذشي لي واقع يستحق نفكر فيه لهاذ الدرجة واش يستحق نعاني بسبابو واش يستحق نبقا سهران بسبابو ؟! 

هو مجرد كلام علاش كاتعطيه هاذ الاهمية كاملة ؟ ربي سبحانه و تعالى و ماسلمش من البشر قالو عليه عندو ولد قالو عليه ثالث ثلاثة و شحال احتقروا الانبياء .... عاد بغيتي نت مايقولو علك والو ! 

ماتمناش أنهم مايقولو علك والو و مايتاهموك بوالو ولكن كن قوي و ماتخليش هدرتهم تسلل لأعماق قلبك و دير فك مابغات و دير فبالك بأن الهدرة فك فك قد كنتي مزيان ولا خايب إذن ماتسوقش لبنادم و عيش حياتك و لي قال فك ولا دار لك شي حاجة تجاهلو و ماضيعش معاه وقتك و عيش اللحظة ماتفكرش فداكشي لي وقع فالتانية لي دازت ماتهزش الهم شي حاجة تافهة وقعت لك و دير فبالك أن كلشي غايدوز ان شاء الله يكون عندك غير الصبر و ايمانك بالله يكون قوي.