ماتخليش الرأي ديال الآخرين يأثر علك ولا يحدد المصير ديالك (مقال تحفيزي)

تذكر الانتصارات الصغيرة لي حققتي فحياتك و اللحظات الصعيبة لي خرجتي منها بعدما كان اليأس وصل للقمة ديالو ! و دير فبالك أنه كيفما قدرتي من قبل حتى دابا راك قادر .. آمن بذاتك و ماتكونش انهزامي و سلبي فتفكيرك ديما التفاءل و يكون عندك أمل واخا ف أحلك الظروف .. و ماتكونش منطقي !! صنع المستحيل كلشي ممكن ماتسمعش لهدرتهم الى كانو هوما ضعاف ماتخليهمش يأثرو علك بهدرتهم السلبية و المتشائمة !! حاول حتى الى فشلتي يكفيك شرف المحاولة .. المهم مايمليوش علك شنو دير و شنو ماديرش ! نت لي ختار الطريق لي بغيتي تمشي فيها و ماتخليش الرأي ديال الآخرين يأثر علك ولا يحدد المصير ديالك.

و كيفما بغا يكون وضعك الحالي كون متأكد أنه ممكن يتغير بإذن الله و يتغير للافضل .. فقط تكون عندك الثقة بأن التغيير ممكن و أنك قآدر دير هاذ التغيير في يوم من الايام و تحقق الاشياء لي كانت تبان لك بعيييدة .. ماتيأسش و دير فبالك أن اغلب لناس لي وصلو كانو بحالك و دازو من النفس الوضع لي كاتعيش فيه الان ولا كفس منو ولكن تحملو مسؤوليتهم و غيرو حياتهم إذن حتى نت قادر تغير حياتك ! واخا تكون فشلتي فالماضي هذا ماكيعنيش أنك غاتبقا فاشل حياتك كاملة .. و ماتخافش من الفشل على الاقل تبع الاحلام ديالك و كون مستعد باش تحققها و حتى الى فشلتي مرة جوج تلاتة و ماوقفتيش كون متأكد أنك غاتوصل بإذن الله .. ربي الى شاف نيتك صافية و عزيمتك قوية غايعاونك و غايسرلك ويسهل علك الطريق باش توصل ..

و من أهم الحوايج لي غايسعدوك باش تنجح هو مساعدة الاخر .. ماتكونش أناني و تحتفظ بشي حاجة عارفها لراسك خوف منك باش الاخر مايديرش بحالك و تبقا نت ديما في القمة، و أي واحد حتاجك وقف معاه حيت حتى نت واحد النهار غاتحتاج شي حد يعاونك .. و الى بغيتي تمشي بعيد حاول تعاشر الناس لي ناجحين لي يحفزوك و يدفعوك للقدام و بعد من أي واحد سلبي و أي واحد كيطيح منك حيت الناس لي كادوز معاهم وقتك حتى هوما عندهم تأثير علك و على حياتك، معامن تفضل دوز وقتك مع شخص ناجح كيعاونك و باغي لك الخير ولا واحد هدرتو كلها سلبية ولا هدرتي ليه على شي هدف عندك يبدا يضحك علك ؟