ماتخليش هدرة بنادم تأثر فك و تقتل الطاقة ديالك !

فهاذ الحياة غاتلقا لي يحبك و لي يكرهك و لي حاقد علك و لي غاينتاقدك بدون سبب ... المشكل ماشي فك .. 

سبحان الله بعض الناس هوما بحال هاكا ماعندك مادير قد كنتي خايب قد كنتي مزيان غاتلقا لي يوقف فطريقك ! .. تانتا ماتصدعش راسك مع بنادم لي بغاك بغيه و لي مابغاكش دير بينك و بينو واحد المسافة و بقا هاني .. 

و ماتحاولش تصنع باش تعجب بنادم ماتخسرش راسك غير باش ترضيهم .. ماكانقولش لك كون أناني ولكن تصرف بالطريقة لي كاترتاح ليها واخا ماتعجبش بنادم ! 

و حاول تجاهل أي واحد أساء لك ماتخليش ديك الاساءة ديالو تأثر فك و تبقا تفكر بزآف و تقول علاش قاليا هاكا و علاش دار ليا كدا .... عرفتي داك الشخص لي كيرمي حجرة في البئر و يتسنا يسمع صوت ارتطامها مع الماء؛ بحال هاكا بعض البشر كيسفزك و كيتسنا ردة الفعل و الانفعال و الغضب ديالك .. نت كون ذكي و حاول تجاهلو و هو غايحس بالتفاهة ديالو و غايجمع راسو بلاما يحس،

أما الى كنتي شخص لي كيتسوق لهدرة بنادم بزآآف كون متأكد أنك غاتعاني بزآآآآف حيت كيفما كنتي مزيان ولا خايب بنادم غايهدر فك و غايحاول يقلل منك .. خصك تعلم كيفاش تجاهل حيت كترة التفكير فداكشي لي كايوقع لك يوميا غايمرض غير النفيسة ديالك و غايقتل الطاقة ديالك و كون متأكد أنك غاتمشي بعيد نهار غاتولي الاساءة ديال بنادم زايدة ناقصة عندك.